ضحية القطر عبد الرحمن الحناوي

#من_ديوان_الحناوي
بشعر العامية المصرية .   
( ضحية القطر .. عفوا الفقر  ) .
------------------------------------
ركب القطر وقال دي أرخص وسيله توصلني *
حكم الفقر ومال على بعض ناس احسن مني *
الظروف اللي انا فيها حكمت عليا بتأسرني *
وحياتي كانت أهي ماشيه وقدرت اعافر مع همي *
يوم شغال ويوم بطال والرزق حلال بيطمني *
لكن الأيام دي ساء الحال والحيره جايه بتظلمني *
****   ****   ****   ****   ****
ركبت القطر وأنا مفلس وقلت حاجه توصلني *
طلع المفتش وأنا بهمس على فين البيه حياخدني *
لقيته بيبص لي بصه وركبي دي سابت مني *
اجيب منين فلوس الأجره وكمان غرامه تبهدلني *
ياريت ما كان ولا يجرى ركوبي القطر حيقتلني *
*****   ****   ****   ****   ****
شخط المفتش قام قاللي فلوسك يلا ناولني *
تمن التذكره طلع يا ابني يا تنزل هنا وتفارقني *
قلت له جيوبي أهي فاضيه أرجوك المره دي سيبني *
أنا لسه على باب الله بكره تفرج  اعذرني *
فتح الباب وقاللي انزل من غير كلام بتأني *
نطيت لبره في الحال والقطر ما هوش مستني * 
قطعت عجلاته رجليه وانا كنت بصرخ إلحقني *
والقطر بيعدي عليه أزعق وأقول مين ينقذني *
سبعين جنيه مبلغ تافه الله يجازي اللي خذلني *
وبقلب مكلوم قال اعاتب كل اللي شاف ولا عاني *
روحي اللي هانت دي عليكو بكره تآسوا أكتر مني *
وتشوفوا ذل ومصايب وعيالكو مش أغلى مني *
قالها ( محمد عيد ) تاني : يا خساره ما حدش عبرني *
****   ****   ****   ****   ****
ومات وهوا بيتألم واعظم دروس كده علمني *
مين بس فينا حيتعلم ولا الظروف أكبر مني *
أدهشني سلبية ركاب كانوا معاه أدهشني *
دا راح ضحية تذكره سعرها في الآخر ما بيغني *
****   ****   ****   ****   ****
أرواح الناس يا ترى اتهانت ولا حد فيكو يكذبني *
لو كنت شايفها اتصانت بعد المريخ ابقى قابلني !! *
يا مفتشين المعيره مين بس فيكم يراجعني *
أشلاء شباب متبعترة مين بس فيكم يسمعني *
روح القانون لازم تظهر ولا الفقير إيه يعني !!! *
****************************
بقلم أ / عبد الرحمن فتحي الحناوي .
الثلاثاء الموافق ٢٩ / ١٠ / ٢٠١٩ .
****************************